Украины эрх баригчид тус улсын эдийн засгийг сайжруулах, авлигатай тэмцэхэд үндэсний боловсон хүчнээс гадна олон улсын нэр хүндтэй, сайн мэргэжилтнүүдийн мэдлэг хүчийг ашиглах нь зүйтэй гэж үзэж Засгийн газартаа гадаадын боловсон хүчнүүдийг урьж ажиллуулж байна.
Өнөөдөр Украины Засгийн газрын танхимд Эрүүл мэндийн сайд нь гүрж улсын иргэн Александр Квиташвили, Эдийн засгийн хөгжлийн сайд нь литвийн иргэн Айварас Абромавичус, Сангийн сайд нь АНУ-ын иргэн Наталья Яресько нар болоод байна.
Энэ хүмүүсийг сайдын үүрэгт ажилд томилж, Украины иргэншил олгохдоо Украины ерөнхийлөгч Петр Порошенко “Төрийн удирдлага, авлигатай тэмцэх ажил, санхүүгийн төлөвлөлт, хямралын эсрэг менежмент зэрэгт үндэсний боловсон хүчний зэрэгцээ олон улсын практик хэзээ ямагт хэрэгтэй байсаар ирсэн. Ийм ч учраасгадаадын өндөр мэргэжилтэй энэ хүмүүст  украины иргэншил олгох зарлигт гарын үсэг зурж байгаа юм” гэж хэлжээ.
Саяхан бас Украины Засгийн газар гүржийн иргэн Екатерина Згулазег Хуульзүйн дэд сайдын албан тушаалд томилсон байна.
Одоо Украины Авлигатай тэмцэх товчооны даргад хамгийн магадлалтай хүнээр Гүржийн ерөнхийлөгч байсан Михаил Саакашвилиг нэрлэж байна. Уг нь энэ албан тушаалд Гүржийн Хуульзүйн сайд байсан Зураб Адеишвилиг нэрлэж байсан удаатай.
Харин гадаадын иргэдийг Засгийн газрын бүрэлдхүүнд, өндөр албан тушаалд  томилж байгаа нь Үндэсний аюулгүй байдалд муугаар нөлөөлнө гэж үзэж байгаагаа украины зарим мэргэжилтэн шинжээчид бичиж байна.