ОХУ-ын Тувагийн Үндэсний музей “Сүбэдэй баатрын шилдэг дүр” шалгаруулах уралдаан зарлаж дүгнэсэн байна. “Кужугет Шойгугийн нэрэмжит соёлын сан”-тай хамтран зохион байгуулсан эл уралдаанаар урианхайн нэрт жанжин Сүбудэйн жинхэнэ төрхийг тодруулахаас гадна түүнийг Субудай, Субедей, Субудей хэмээн хэдэн янзаар нэрлэдгийг нэг мөр болгох зорилго тавьжээ.
Шүүгчид уралдаанд ирсэн олон зургаас Начын Шалык, Роберт Балган болон  Сайын Чимит гэсэн гурван зураачийн бүтээлийг шигшиж аваад Тувагийн зураачдын ордны зураач Роберт Балганы бүтээлийг тэргүүн байрт оруулан шалгаруулжээ.
Арваннэгдүгээр сарын 17-ноос эхлэн нэг сар үргэлжилсэн уралдаанд нийтдээ  108 зураачийн 147 бүтээл ирсэн гэнэ. Уралдаанд оролцогсдын хамгийн өндөр настай нь 68 настай Владимир Хертек байсан бол хамгийн залуу нь 7 настай Аракчаа Анчы байжээ.