Умард Солонгосын хилчид хоол хүнс, мөнгө олох гэж хил орчмын хөлдсөн гол гатлан хятадын нутагт орж ирэн дээрэм тонуул хийх нь элбэгшжээ. Өмнө нь тэд авлигаар амь зууж байсан бол удирдагч Ким Чен Уны хэрэгжүүлж байгаа авлигын эсрэг кампанийн улмаас аргагүй ийм байдалд орсон гэнэ. Умардын цэрэг, энгийн дээрэмчдийн гарт хятадын хил орчмын  Наньпин тосгоны оршин суугчид илүүтэй өртөж хохирдог байна. Сүүлийн хэдэн жилд умард Солонгосын дээрэмчдийн гарт энэ тосгоны 20 орчим хүн өртөж амь алджээ.
Хятадын нэрээ хэлэхийг хүсээгүй түшмэлийн хэлснээр бол өнгөрсөн арванхоёрдугаар сард умард солонгосын нэг цэрэг энэ тосгоны дөрвөн хүнийг буудан хороожээ. Есдүгээр сард бас солонгосын энгийн нэгэн дээрэмчин ердөө 81 долларын төлөө хятадын нэгэн гэр бүлийн гурван хүнийг үхтэл нь зодсон явдал гарсан байна.
Өнөөдөр Умард Солонгосын нийт хүн амын 70 хувь нь хүний хэрэгцээт хүнс тэжээл авч чадахгүй байгаа юм. Удирдагч Ким Чен Ун өөрийн авга ах Чан Сон Тхэкийг “хар тамхи хэрэглэсэн, авлига авсан, бүсгүйчүүдтэй зүй бус харьцаа тогтоож, мөрийтэй тоглосон” зэрэг хэрэгт буруутган цаазаар авсны дараа хүн амын амьдрал улам дордсон юм. Чан Сон Тхэк нь хятадтай хийдэг худалдааны харилцааг хянадаг байсан болохоор түүнийг цаазлуулсны дараа байдал ийн муудсан байна.
Умард Солонгосын арми энгийн иргэдийг бодвол харьцангуй сайн хангамжтай байдаг ч хилчдийн хувьд авлигагүйгээр амьдардаггүй байснаас Ким Чен Уны  авлигын эсрэг кампани хүчтэй цохилт болжээ.
БНАСАУ-ын эрх баригчдын урагшгүй байдал нь энэ оронд бүх нийтийн өлсгөлөн нүүрлэхэд хүргээд байгаа гэж гадаадын шинжээчид үзэж байна. 1995-1999 онд гэхэд л янз бүрийн эх сурвалжийн мэдээгээр  100 мянгаас 3,0 сая хүн өлсгөлөнд нэрвэгдэж байсан юм.