Умард Солонгост дахиад л цэвэрлэгээ эхэлсэн бололтой. БНАСАУ-ын зэвсэгт хүчний Оперативын газрын дарга Пхен Ин Соныг нэгдүгээр сарын сүүлчээр баривчилж цаазаар авчээ гэж Өмнөд Солонгосын тагнуулын газрын мэдээллээс иш татан хэвлэлүүд бичиж байна. Дөрвөн одтой генерал,  удирдагч Ким Чен Уны саналыг хүлээн зөвшөөрөлгүй өөрийнхөөрөө зүтгэсэн бололтой. Санал зөрөлдсөн шалтгааныг хэвлэлүүд бичээгүй байна.
Эндээс үзэхэд Ким Чен Ун өнөө хэр цэргийнхэнд итгэхгүй хэвээр байгаа бололтой. Умард Солонгосын цэргийн томцуул, генералуудын дунд айдас бий болж одоо хэн өртөж хэлмэгдэх бол гэцгээж байна хэмээн Сөүл үзэж байна.
Үүний зэрэгцээ Умардын удирдагч Ким цэргийн барилгын тэргүүн Ма Ву Чуныг албан тушаалаас нь зайлуулж Үндэсний батлан хамгаалах хорооны бүрэлдхүүнээс гаргасан гэж байна. Түүнийг мөн л тушаал биелүүлээгүй, авлига авсан гэж буруутгасан гэнэ.
Ким Чен Ун засгийн эрхэнд гарснаас хойшхи гурван жилийн хугацаанд өндөр албаных нь хүрээнд цэвэрлэгээ хийх замаар нэг сая гаруй хүнтэй Солонгосын армийг гартаа бүрэн оруулахыг эрмэлзэж байна. 2012-2014 онд Умард Солонгост цэргийн болон нам засгийн  50 гаруй өндөр албан тушаалтныг цаазаар авсны дотор Ким Чен Уны авга ах Чан Сон Тхэк хүртэл байгаа юм хэмээн Bloomberg мэдээлжээ.