Тайваны өмнөд нутгийн Гаосюн хотын хорих ангид хоригдож байсан зургаан хоригдол зэвсэглэж хүмүүс барьцаалан  14 цагийн турш байснаа өнөөдөр өглөөний 05 цагийн үед бүгдээрээ нэгэн зэрэг амиа хорложээ.

Тэд өнгөрсөн хугацаанд хоёр машин өгч, шоронгоос гарахад садаа учруулахгүй байхыг шаардаж байснаас хэдэн зуун цагдаа шоронг бүслээд байсан юм. Хэлэлцээр хэдэн цаг үргэлжилж зөвшилцөлд хүрч чадаагүй байна.
Тэд эмнэлгийн тусламж авъя хэмээн шоронгийн эмнэлэг рүү явах замдаа хамгаалалтынхныг барьцаалан зэвсгийн агуулах руу орж дөрвөн автомат, зургаан гар буу, 200 сум авсан юм байна. Барьцаалагдсан хүмүүсийн дотор шоронгийн дарга ч байжээ. Энэ хэргийг зохион байгуулсан гэх Жэн Лидэ нь тайваны гэмт хэргийн “Хулсны холбоо” гэдэг том бүлэглэлийн идэвхтэн бөгөөд хүн амины хэргийн төлөө 28,5 жилийн ял авсан юм байна.
Бүс нутгийн Хуульзүйн дэд сайд Чен Мин Таны мэдээлснээр бол цагдаагийнхан бүслэлтээ хумьж шорон руу дайрах үеэр тэр зургаан хэрэгтэн бүгдээрээ амиа хорлосон байна. Энэ үеэр бусад хүмүүс өртөж гэмтэж шархдаагүй гэж орон нутгийн  Central News Agency агентлаг мэдээлжээ.