Украины ерөнхийлөгч Петр Порошенко зарлиг гаргаж Гүржийн ерөнхийлөгч асан Михаил Саакашвилиг өөрийн гадаад бодлогын зөвлөхөөрөө томилсон нь хоёрдугаар сарын 13-ны өдөр төрийн тэргүүний сайтад нийтлэгджээ.

Зарлигт “Михаил Саакашвилиг Украины ерөнхийлөгчийн гадаад бодлогын зөвлөхөөр томилсугай” гэсэн байна. Үүний зэрэгцээ Петр Порошенко ерөнхий-лөгчийн дэргэд өөрчлөлтийн олон улсын зөвлөл байгуулан тэргүүнээр нь Саакашвилиг томилжээ. Энэ зөвлөлийн үндсэн үүрэг нь олон улсын туршлагаар өөрчлөлт хийх санал боловсруулах гэнэ.
“Михаил Саакашвили Украин улсыг гадаадад төлөөлөхийн зэрэгцээ Украинд олон улсын нийгэмлэгүүдийг төлөөлөх болно. Тэрээр Украиныг дэлхий ертөнцтэй өөрчлөлтийн асуудлаар холбож чадна гэдэгт бид итгэлтэй байна” гэж Порошенко тэмдэглэжээ.
Харин Саакашвилигийн эсрэг хэд хэдэн эрүүгийн хэрэг үүсгээд байгаа Гүрж улс үүнийг эсэргүүцэн хүлээн авч байна.
Украин 2014 оны арванхоёрдугаар сараас гадаадын зарим иргэдийг Засгийн газрын бүрэлдхүүндээ оруулаад байгаагийн дотор Гүржийн Эрүүл мэндийн сайд асан Александр Квиташвили Украины эрүүл мэндийн сайд болсон бол Екатерина Згулазе Украины Дотоод хэргийн сайдын орлогч, Гия Гецазе Украины Хуульзүйн сайдын орлогч болсон юм. Тэд бүгд Саакашвилигийн Засгийн газарт ажиллаж байсан юм.