Өмнөд Африкт гадаадын иргэд газар эзэмших эрхгүй болох гэнэ. Тус улсын Ерөнхийлөгч Жэйкоб Зума гадаадын иргэдийн газар эзэмших эрхийг хязгаарласан шинэ хуулийн төсөл санаачилж, энэ жилдээ багтаан парламентаар батлуулах төлөвлөгөөтэй байгаа аж.

Өмнөд Африкт арьс өнгөөр ялгаварлах үзлийг халаад  хорь гаруй жил өнгөрсөн ч өмчлөгдсөн газрын дийлэнх нь цагаан арьстнуудын эзэмшилд очоод байгаа юм. Тийм ч учраас хүн амын дийлэнхийг эзлэх хар арьстнуудад газар өмчлүүл гэж Засгийн газар байнгын дарамт шахалтад өртөж, шүүмжлэл хүлээдэг учир Өмнөд Африкийн хувьд эмзэг сэдэв болжээ.

Газар өмчлөлийг цэгцтэй хуулийн дагуу шийдэж, нутгийн уугуул иргэддээ давуу эрх олгосноор өнгөрсөн үеийн бараг бүхий л хар бараан түүхтэй холбоотой энэ ужгирсан асуудлыг шийдвэрлэж чадна гэж Жэйкоб Зума үзэж байна.  
Шинэ хууль батлагдвал гадаадын иргэд газар өмчлөх эрхгүй, зөвхөн олон жилээр түрээслэх боломжтой болох бөгөөд хөдөө орон нутгийн фермерүүдийн хувьд 12 мянган га-гаас илүү газар эзэмших нөхцөлийг хаах юм. Өмнөд Африкийн фермийн үржил шимтэй газрын ихэнх хэсэг нь цагаан арьст фермерүүдийн гарт орчихсон учир үүнийг ч бас хазаарлах зорилготой аж. Тус улсын эрх баригч Африкийн үндэсний конгресс нам газар өмчлөлийн тал дээр бүр радикал санаа гаргаж, цагаан арьстнуудын эзэмшиж буй газрыг нөхөн төлбөр өгөхгүйгээр хураан авах хэрэгтэй гэж байсан юм.