Украины салан тусгаарлагчид нутгийн зүүн хэсгээс хүнд зэвсэг техникийнхээ дийлэнх хэсгийг татсан болохыг тус улсын Ерөнхийлөгч Петро Порошенко зарлалаа. Тэрээр мөн Украины арми ч пуужин, хүнд артиллерийн систем зэрэг зэвсэг техникийнхээ нэлээд хувийг хойш татсан гэж мэдэгдсэн байна. Өнгөрсөн сард байгуулсан гал зогсоох гэрээний дагуу энэ сарын эхээр хоёр тал хүнд зэвсэг техникээ татах ёстой.
Гуравхан хоногийн өмнө Петро Порошенко салан тусгаарлагчдыг олон улсын зөвлөмжийн дагуу зэвсгээ татахгүй байна гэж буруутгаж байсан ч өчигдөр хоёр тал хоёулаа нэлээд хэмжээний зэвсгийг мөргөлдөөний бүсээс гаргасан гэж баталлаа.
Бодит байдал дээр үнэхээр гал зогссон эсэх тухайд тэрээр “Аль өнцгөөс яаж харахаас л гал зогссон эсэх нь хамаарна” гэж хэлээд албан ёсоор гал зогсоосны дараа буюу хоёрдугаар сарын 15-наас хойш Украины армийн 64 цэрэг амь насаа алдсаныг дурдсан байна. Нийтдээ Украины дайнд армийн 1549 цэрэг амь үрэгдсэн гэж П.Порошенко хэллээ. Харин дайны хөлд нийтдээ  6000 гаруй хүн амь үрэгдэж, нэг сая гаруй хүн орон гэрээ орхин дүрвэсэн юм.