Энэ явдал Польшийн Тересполийн хилийн шалган нэвтрүүлэх хэсэг дээр болжээ. Москва-Ниццагийн чиглэлийн галт тэргэнд шалтгалт хийх үеэр францын нэг иргэний чемодан нь арай л том харагдаад байж. Польшийн хилийн шалган нэвтрүүлэхийн ажилтнууд чемоданыг нээж үзвэл франц эрийн орос гаралтай эхнэр нь тэнд хэвтэж байсан гэнэ.
Учрыг тодруулбал орос бүсгүйд шенгений виз өгөхгүй байснаас ийм маягаар явж франц хүрэхийг оролдсон нь энэ юм байх.
Польшийн хилийн отрядын хэвлэлийн нарийн бичгийн дарга Дариуш Синички “Гадаадынхан хууль бусаар хил нэвтрэх гэж янз бүрийн л арга хэрэглэдэг. Гэхдээ л миний хувьд бол чемонданд нуугдаж хилээр гарах гэж оролдохыг анх удаа үзлээ” гэсэн байна. Чемоданаас гарч ирсэн эмэгтэйн бие сайн, эмнэлгийн тусламж шаардлагагүй гэжээ.

Одоо франц эр, орос бүсгүй хоёрт улсын хилийг хууль бусаар нэвтрэх гэсний нь төлөө гурван жилийн ял нүүрлэж байна.