УИХ-ын гишүүн асан Д.Батбаяр ийм тайлбар өглөө.

-Таныг оффшор данстай гэх мэдээлэл цацагдлаа. Үүнд та ямар хариулт өгөх вэ?
-Оффшор данс гэдэг нь өөр оронд данстай иргэнийг хэлнэ гэж би бодож байна. Тэр утгаараа надад 3,4 оффшор данс байдаг. Үүнийг нуугаад байх зүйлгүй. Японд амьдарч байсан болохоор 4-5 данс нээсэн хаалгаагүй байгаа. Харамсалтай нь мөнгө байхгүй, хоосон байгаа. Одоо яриад байгаа арлуудын оффшор данс гэж надад байхгүй. Нээлгүүлээгүй. Очиж үзэх нь битгий хэл дуулаагүй ч орнууд байна билээ.

-Зөвхөн Японд дастай гэж үү?
-Тэгэлгүй яахав. Би бол төрөөс төрсөн тэрбумтан биш. Тендерт нэг ч удаа оролцож байгаагүй. Тухайн үед барилдаж байхдаа яалт ч үгүй дансаар цалингаа авах учир 3-4 данс нээлгэсэн. Татвар нуугаад, зорилгоор данс нээсэн юм байхгүй.

-Та хэдэн компанитай вэ?
-Гадаадын орнууд гэвэл Японд бол ганц хоёр, Монголд 20 гаруй 30 орчим компани бий. Үйл ажиллагаа нь айхтар яваад байгаа юм алга. Цөөхөн хэд нь л ажилладаг.

-2012-2014 онд УИХ-ын гишүүн байхдаа хөрөнгө орлогын мэдүүлэгтээ тухай бүрт нь тусгаж явсан уу?
-Зодгоо тайлаад үлдэгдэл нь хэдэн мянган иен, монгол мөнгөөр 20-30 мянган төгрөг үлдээд дансаа таг мартсан юм үнэндээ. Хөрөнгө орлогын мэдүүлэгтээ гадаадад ямар ч мөнгө байхгүй гэж тухай үедээ мэдүүлж байсан. Дансыг цаанаас нь хаачихдаг юм бодсон хаагаагүй байгаа юм байна.

-Тэгэхээр энэ худлаа мэдээлэл гэсэн үг үү?
-Нэг бол нэр андуурсан. Эсвэл эргээд бодлогоор Ардчилсан намаас заавал нэг хүн наах ёстой байсан юм уу. Ямар нэг байдлаар оруулах гэсэн үү мэдэхгүй байна.

-Таны компаниуд оффшор бүст үйл ажиллагаа явуулдаг юм уу?
-Дандаа Монголд үйл ажиллагаа явуулдаг. Эмнэлэг, спортын чиглэлээр. Японд байгаа данс бол компанийнх биш. Барилдаж байхад тухайн үед цалингаа авч байсан, даатгал хийлгэж байсан данс. 

-УИХ-ын сонгуульд нэр дэвших үү?
-УИХ-д нэр дэвшихээ Ардчилсан намд албан ёсоор мэдэгдсэн. АН-ын ҮЗХ-ноос шийдвэр гаргах байх.