Хятад улсад христийн шашинтан 100 сая хүн байдаг гэсэн тооцоо бий. Хятадад баян, ядуугийн ялгаа улам ихсэж буй зэргээр нийгмийн асуудал муудсаар байгаатай зэрэгцэн тус улсын хотууд, хөдөө орон нутагт христийн шашинтнуудын тоо өссөөр байгаа юм.
Тус улсын эргийн Чэньцян мужийн Венжоу хотын албаны хүмүүс итгэгчдийн хандиваар барьсан сүмийг нурааж эхэлжээ.
Тэдний хэлснээр, сүмийн барилгыг хууль бусаар барьсан аж. Тэд цагдаагийн олон албан хаагчийг дайчилж, хүнд даацын машин механизмаар барилгыг нураасан байна.
Сүмийн барилгыг нь нураасыг 3000 орчим хүн эсэргүүцэж, магтан дуугаа дуулжээ. Сүмийн албаны хүмүүсийг цагдаа нар авч явсан гэсэн мэдээлэл байна.
Мөн тус мужийн Тайжоу, Жоушань хотын сүмүүдийн загалмайг хураан авчээ.
"Хууль бусаар барьсан барилгуудыг өнгөрсөн оноос нурааж эхэлсэн. Шашныг дарахын тулд ингэж байгаа юм биш. Хууль бусаар барьсан л бол төрийн өмчийн аж ахуй нэгжийнх ч байсан ялгаагүй нурааж байгаа" гэж тус мужийн албаны хүмүүс хэллээ.
Христийн шашин эрх баригчдын хяналтаас гадуур тархаж байгааг Коммунист намын улс төрийн эрх мэдэлд аюул учруулж болзошгүй гэж Хятадын Засгийн газар үзэж байгаа бололтой.