Г.Тунгалаг
Хориодхон настай хоёр эмэгтэйг хэрцгийгээр хөнөөж, толгойг нь тасдаж, цогцсыг нь газарт булсан аймшигт хэрэг олныг сэрдхийлгэлээ. Баянзүрх дүүргийн есдүгээр хороонд энэ сарын 6-7-нд шилжих шөнө 19 настай Б, 20 настай Х нар харгис алуурчны гарт амь насаа алдсан хэрэг гарлаа. Цагдаагийнхан хохирогчдын хэн болохыг тогтоож, сэжигтэнг шуурхай илрүүлжээ.

Хэргийн газарт цагдаагийнхан гурван удаагийн үзлэг хийж нийт 61 эд мөрийн баримт олж, үүндээ түшиглэн цагдаагийн албан хаагчид биечлэн эрэн сурвалжилж, хохирогчидтой хамгийн сүүлд хамт байсан И,З нарыг сэжигтнээр баривчилжээ.  Сэжигтнүүдийг хэрэг гарснаас 48 цагийн дотор илрүүлж чадсан аж. Сэжигтэн З-г Дархан-Уул аймгаас, И-г Улаанбаатар хотоос баривчилж анхны мэдүүлэг авсан байна. 

Хэргийн газрын нотлох баримттай мэдүүлэг авахад сэжигнүүд эхнээсээ хэргээ хүлээж байгаа гэнэ. Хохирогчид сэжигтэн З-гээр дамжуулж, И-тэй тэр өдөр танилцаж, хамт архи ууж байгаад Баянзүрх дүүргийн 9 дүгээр хороонд байрлах З-гийн гэрт ирж хоол иджээ. И хохирогчдыг дагуулж Хар хошуу хэмээн ууланд гарч архидаж байхдаа маргалдаж улмаар  хоёр эмэгтэйн амийг хөнөөсөн аж.

Харин З хэрэг гарах үед унтаад үлдсэн гэжээ. Хохирогчдын цогцсонд хийсэн задлан шинжилгээний хариу одоогоор гараагүй байгаа аж. Хэргийн газрын эхний үзлэгээр хоёр эмэгтэйн нэгний цогцос толгойгүй байсан төдийгүй одоог хүртэл толгой нь олдоогүй байна.

Гэмт хэргийн үйлдсэн гэж сэжиглэгдсэн И нь 1991 онд төрсөн Өвөрхангай аймгийн харьяат, 2012 оны тавдугаар сард Эрүүгийн хуулийн 99.1-ээр  нэг сар баривчлах ялаар шийтгүүлсэн. Хохирогчдын хувьд дунд боловсролтой эрхэлсэн ажилгүй байсан гэнэ. Сэжигтний мэдүүлснээр хохирогчтой маргалдаж чулуугаар нүүр рүү нь цохиж ухаан алдуулсан цогцсыг зөөвөрлөх гэж оролдсон байна. Хэргийг  үргэлжлүүлэн шалгаж байгаа аж.