Нийслэлийн хүн ам сүүлийн жилүүдэд эрс өсч, 1.2 сая оршин суугчтай болсноор дэлхийн саятан хотуудын эгнээнд хэдийнэ шилжсэн. Энэ хэрээрээ амьдрах орон зай улам нягтарч зах зээлийн урьд тааварлаагүй шинэ орчин, төлөв байдал бий болгож эхлэв. Энэ бүхнийг хууль, дүрэм журмаар зохицуулах үүргийг төр хүлээдэг. Үүний тулд иргэн та бид татвараа төлж, тэр хөрөнгө мөнгөөр хууль, эрх зүйн олон харилцааг зохицуулж байдаг билээ. Хүн амын өсөлтийг дагалдан нийслэлийн авто машины тоо ч өссөн. Хотын шүдний өвчин болсон замын түгжрэл, осол аваар, иргэдийн эрүүл, аюулгүй орчинд амьдрах эрх зөрчигдөх зэрэг үзэгдэл өсч байгаа нь үүнтэй холбоотой. Энэхүү сөрөг үзэгдлийг буу­руулж, өөрийнхөө ажил­лаж, амьдрах эрхээ эдлэхийн тулд иргэд татвараа цаг алдалгүй төлөх ёстой. Нийслэлийн на­санд хүрсэн иргэн бүр ма­шин тэрэг хөлөглөдөг болчихсон гэхэд хилсдэхгүй. Тэд маань үүрэг хариуцлагаа хэр­хэн ухамсарлаж, биелүүлж бай­гаа нь авто тээврийн болон өө­рөө явагч хэрэгслийн тат­вар, агаарын бохирдлын төл­бөр, автозам ашигласны төлбөрөө хугацаанд нь төлж буй эсэхээс нь харагддаг. Одоо нь дүгнэвэл хангалттай хэмжээнд хүрээгүй л байна.

Нийслэлийн төсвийг бүр­дүү­лэх, холбогдох хууль тог­тоомжийн хэрэгжилтийг хан­гах зорилгоор Улаанбаатар хо­тод бүртгэлтэй бүх төр­лийн авто тээврийн болон өө­рөө явагч хэрэгслийн ал­бан татвар, агаарын бо­хирд­л­­ыг төлбөр, автозам ашиг­ласны төлбөр хураах ажлыг өнгөрсөн гуравдугаар сарын 20-ны өдрөөс энэ сарын 31-ний хооронд баг­таан хэрэгжүүлэхийг нийс­лэ­лийн Засаг даргаас тус­гай захирамж гаргасан нь бий. Албан татвар төл­бө­рөө хуулийн хугацаанд тө­лөө­гүй тээврийн хэрэгсэл эзэм­шигч иргэн, аж ахуйн нэгж, байгууллагын дутуу төлөл­­тийг хураан бараг­дуу­лах, хариуцлага тоо­­цох эрчимжүүлсэн хянал­тын үзлэг, шалгалтыг зур­­га­­дугаар сарын 10-наас эх­­лүүлэх юм. Иргэний үүргээ бие­лүү­лээгүй бол толгойг нь илээд байхгүй нь тодорхой. Албан татвар, төлбөр төлснийг гэрчлэх гурвалжин наалт тэмдэг хэрэглэхгүй болчихоод байгаа. Зорчих хэрэгслийн аюулгүй байдал болоод төсвийг хэмнэх үүднээс гаргасан энэ шийдвэрийг “буруу суваг”-аар ойлгосон эрхэм байхыг үгүйсгэхгүй. Нийслэлээс үүнтэй холбогдуулан авто тээврийн хэрэгсэл бүрийг хяналт шалгалтад хамруулж, дээр өгүүлсэн үүргээ биелүүлээгүй, техникийн хяналтын үзлэгт ороогүй авто тээврийн хэрэгслийг замын хөдөлгөөнд оролцуулахгүй байх арга хэмжээ авч, хяналт тавьж ажиллахыг эрчимжүүлж байна. Мэдээж замын хөдөлгөөнд оролцох эрхгүй авто тээврийн хэрэгслийг гудамж, замд суурилуулсан камерын тус­ламжтайгаар илрүүлэх тө­дий­гүй Нийслэлээс замын цагдаагийн газрыг мэдээгээр ханган хамтран ажиллахаар болсон билээ. Эрхэм жолооч таны чихэнд наалдацтай нэг мэдээ гэвэл татварын албаны нэг цэгийн үйлчилгээгээ дамжуулан төлбөр төлөгч­дөд нэг цэгээс хүндрэл чирэг­дэлгүй үйлчилгээг үзүүлж эхлээд байгаа юм. Энэ нь иргэн таны хайран цаг хугацааг ямар ч төвөг, чи­рэг­дэлгүйгээр хэмнэсэн ажил болоод буй. Эдүгээ дүүр­гийн нутаг дэвсгэрт байр­лах томоохон аж ахуйн нэгж, байгууллагуудын авто тээврийн хэрэгслийн жаг­саал­тыг гаргуулж, татварын албатай тулгалт хийн албан татвар, төлбөр хураах ажилд бүрэн хамруулахаар ажиллаж байгаа юм. Түүнчлэн авто тээврийн холбоотой мэдээлэлд үндэслэн үйл ажиллагаа явуулдаг төрийн байгууллагуудад “Дундын мэдээллийн сан үүсгэх, уг дундын санг удирдах систем” бий болгож байгаа шинэ ажил байна. Одоогийн ашиглагдаж байгаа авто тээврийн хэрэгслийн зөрчил, торгуулийн системийг өргөтгөснөөр автотээвэр болон өөрөө явагч хэрэгслийн албан татвар, агаарын бохирдлын татвар, зам ашигласны татвар, техникийн хяналтын үзлэг, даатгал, татварын хуудас эзэмшигчийн хаягийн мэдээлэл солилцох боломж бүрдэх юм.

Яг одоогоор torguuli.mn сайтад зөрчилтэй холбоотой мэдээллийг нэгтгэснийг олон хүн мэддэг болжээ. Байгууллагуудын хооронд сүлжээний дэд бүтэц ч бий болсон. Зам, тээврийн яам болон Татварын ерөнхий газрын хооронд мэдээлэл солилцдог боллоо. Гэрээгээ ч байгуулав. Тэгэхдээ эрх бүхий байгууллагуудын хоорондын мэдээллийн шинэчлэлийг хийх­гүй байгаас иргэдэд бо­лон төрийн үйлчилгээнд чи­рэгдэл учруулж буйг ан­хаар­маар. Тухайлбал, нийтийн тээврийн хэрэгслийн 65 ху­виас л татвар авч дөнгөж бай­на. Үлдсэн 35 хувиас тат­вар авдаг болох хэрэгтэй л дээ.

Мөн ямар ч бүртгэлгүй тээв­рийн хэрэгслийн татвар тө­лөлтүүд орж ирдэг. Өө­рөөр хэлбэл, мэдээлэл, бүрт­гэл алдаатай байна гэ­сэн үг. Өөр анхаарах зүйл бол татварын газар болон банкуудын хооронд татвар төлөлтийг онлайн болгох шаардлагатай байгаа гэсэн. Учир нь, төлөлтийг онлайнаар мэдээлэхгүй байвал иргэд бухимдаж таарна. Уншигч та анзаарсан бол тээврийн хэрэгслийн зөрчил дээр нэмээд татвар, замын төлбөр, оношилгоо, даатгалын мэдээлэл нэмэгдэж нэг цэгээс бүгдийг нь авах боломжтой болох юм. Үүнийг л иргэд маань олон жил хүсч, хүлээсэн хэрэг шүү дээ. Зарим мэргэжилтний хэлж байгаагаар нийслэлийн  замын цагдаа болон замын хөдөлгөөнийг удирдах төвийн торгууль, төлөлтийн хэмжээ ч нэмэгдэх юм. Адаглаад татварын хуудас эзэмшигч иргэний  хаягийн бүртгэл сайжирна зэргээр олон үр дүн гарч байгаа билээ.