Монголын мэдээллийн технологи, програм хангамж үйлдвэрлэлийн салбарт 100 тэрбум+100 сая ам.долларын зах зээл байгаа гэсэн ба­рим­­­­­жаа тоо бий. Харин бодит тоог энэ салбарт үйл ажиллагаа явуулж байгаа компаниуд болон бодлого шийд­вэрийг гаргадаг удир­дах байгууллагынхан ч хэлж чадахгүй байна. Энэ нь програм хангамж үйлдвэр­лэлийн бүтээг­дэхүүний зах зээлийг судлахад захиалагч талаас эхлээд эрэлт, нийлүүлэлт, гүйцэтгэгч гадна, дотны олон компанийн үйл ажиллагааг давхар судлахаас эхлээд олон бэрхшээлээс үүдэлтэй гэнэ. Гэхдээ энэ салбарынхан наад захын зах зээлийнхээ бодит багтаамжаас эхлээд тулгарч байгаа асууд­лаа шийдвэрлэхийн тулд өнгөр­сөн жилээс чуулж эхэлсэн юм. Тодорхой нэг сэдэв бус тулгарч байгаа 6-7 асуудлыг дэвшүүлж гарах гарц, үр дүн хайдаг энэ чуулган өчигдөр хоёр дахь удаагаа боллоо.
Хэдийгээр тус салбарыг “2000 оноос эхлээд улсын нийгэм, эдийн засгийн хөгжлийг хурдасгагч салбар гэж албан ёсоор хүлээн зөвшөөрсөн” ч “Монголын програм хангамж үйлдвэрлэлийн салбарын чуулган”-ыг хоёр дахь удаагаа зохион байгуулсан нь чамлалттай үзүүлэлт юм. Гэхдээ чуулган хийж эхэлсэн нэг жилийн хугацаанд энэ салбарт үйл ажиллагаа явуулдаг хувийн компани болон бодлого шийдвэр гаргадаг харьяа агентлагуудын уялдаа холбоо эрс сайжирсан учраас хүний, өөрийн гэлтгүй тулгарч байгаа асуудлаа хурдан хугацаанд даван туулах боломжтой болсон гэдгийг чуулганд оролцогсод дүгнэж байна.  

Хөгжлийг кодчилъё

Анхдугаар чуулганыг “Монгол ухаан монгол брэндийг бий болгоё” уриатай явуулж иновацид суурилсан бүтээгдэхүүнийг бий болгох суурийг тавьсан учраас энэ удаад “Хөгжлийг кодчилъё” гэсэн уриан дор мэдээлэл, харилцаа холбоо, технологийн салбарын байгууллага, үндэсний програм хангам­жийн компаниуд, төрийн байгууллагуудын мэдээллийн технологийн мэргэжилтнүүд болон их дээд, мэргэжлийн сургуулиудын эрдэмтэн, багш, судлаачдыг цуглуулжээ. Түүнчлэн програм хангам­жийн үйлдвэрлэл мэдлэгт суурилсан ухаалаг төрийг бай­­гуу­лах, дотооддоо програм хангамжийн үн­дэс­­ний үйлдвэрлэлийг бий болгох, бүх шатанд мэдээ­лэл технологийг өргөн хэрэглэх зэргээр мэдээллийн технологийн үйлдвэрлэлийг өргөжүүлэх зорилго тавьжээ.
Мөн програм хангамж үйлдвэрлэгчдийн зах зээл, хөрөнгө оруулалтын орчинг сайжруулан, хамтын ажиллагааг нэмэгдүүлэх замаар Монголын програм хангамж үйлдвэрлэл дэлхийд өрсөлдөх боломжийг бий болгохын тулд ирэх жилүүдэд мэдээллийн систем, програм хангамжийг чанаржуулах, програм хангамжийн оюуны өмч, зохиогчийн эрхийн бүрт­гэл, түүний хамгаалалтын тог­толцоог боловсронгуй бол­гох зэргийг анхаарч ажиллах аж.
Харин дээрх зорилго, зорилтуудыг хэрхэн биелүүлэх талаарх асуудлыг үндсэн болон салбар хуралдаанаар ярилцаж, тэндээс гарах санал санаачлагыг нэгтгэн хэрэгжүүлэхээр болсон юм.

Хөрөнгө оруулалтыг нэмэгдүүлнэ

Салбар хуралдаанд орол­цогсод програм хангамж үйлдвэрлэлийн салбарт хууль эрхзүйн орчин үгүйлэгдэж байгаа нь бүх асуудлын зангилаа гэдэгтэй санал нэгдэж байна. Тиймээс нэн түрүүнд энэ салбарын үйл хөдлөлийг удирдаж байгаа хуульд зарим нэг өөрчлөлт оруулах талаар хувийн аж, ахуйн нэгжүүд санал гаргаж, бодитой мөнгөн туслалцаа үзүүлж чадахгүй бол татвар, НӨАТ зэргийг хөнгөлөх за­маар Засгийн газрыг дэмжлэг үзүүлэх боломжтой гэж харж байгаагаа хэлсэн юм. Харин програм хангамж үйлд­вэрлэгчийн санхүүгийн ча­давхийг нэмэгдүүлэхэд хөрөн­гө оруулагчид болоод санхүүгийн үйлчилгээ үзүүлэг­чид програм хангамжийн үйлдвэрлэлийн салбарынхан хоорондоо ойлголцож, түнш­лэлийг нэмэгдүүлэх нь чухал байгаа аж. Мөн програм хан­гам­­жийн бүтээгдэхүүн үйлчил­гээний чана­­рыг сайжруулахдаа зах, зээлийн эрэлт хэрэгцээ, шаард­лагыг илүү нээлттэй, то­дорхой болгох замаар шийдэх боломжтой гэж үзсэн юм.