1941-1945 оны Эх орны дайны аугаа их ялалтын 70 жилийн ойд ОХУ-ын Ерөнхийлөгч Владимир Путин улс орнуудын ялангуяа холрбоотон байсан гүрнүүдийнхээ төрийн тэргүүнүүдийг урьсны дотор Монгол Улсын Ерөнхийлөгч Ц.Элбэгдорж  орж энэ түүхэн ойд оролцохоо илэрхийлээд байна.
Зөвлөлтийн 20 гаруй сая хүний амийг авч одсон энэ дайны хүндийг нуруундаа үүрч гарсан ЗХУ-ын ганц холбоотон нь Монгол Улс байж чадлынхаа хэрээр фронтод байлдаж байгаа улаан арми, зөвлөлтийн ард түмэнд тусалж байсан юм.
1941 оноос БНМАУ зөвлөлтийн ард түмэнд морь бэлэглэх ажил эхлүүлж дайны туршид нийтдээ 500 мянга орчим агт худалдаж, бэлэглэсэн бол 500 мянган тонн мах, 64 мянган тонн ноос нийлүүлжээ. 1942-1945 онд фронтод байлдаж байгаа нийт дайчдын таван хүн тутмын нэг шинель нь монголын ноосоор хийсэн шинель байсан гэдэг.
Үүний зэрэгцээ монголчууд байлдаж байгаа улаан армид дулаан нэхий дээл, бээлий, эсгий гутал бэлэглэж байсан юм. 1941 оны арваннэгдүгээр сарын 7-нд Улаан талбайгаар жагсан өнгөрч шууд фронтод очиж Москваг хамгаалсан нөөц  армиуд чухам монголчуудын бэлэглэсэн нэхий дээл, эсгий гутлаар хувцасласан байсан юм.

Монголчууд бас  өөрсдийн хөрөнгөөр “Хувьсгалт монгол” танкийн бригад, “Монгол ард” нисэх эскадриль байгуулан фронтод илгээсэн нь Берлин хүртэлх зам туулж дайчин алдраа мандуулсан гэдэг.

Энэ оны тавдугаар сарын 9-нд Москвагийн Улаан талбайд болох ялалтын баярын парадад Монгол Улсын зэвсэгт хүчний төлөөлөл дайчдыг орлцуулах талаар Монгол Улсын ерөнхийлөгч Ц.Элбэгдорж, ОХУ-ын төрийн тэргүүн В.В.Путинд санал тавьсан ч энэ талаар эцсийн шийдэл гараагүй байна. Тэгээд ч Улаан талбайд болох баярын парадад холбоотон гүрнүүдийн цэрэг дайчдын төлөөлөл оролцож жагсах эсэх нь шийдэгдээгүй байгаа юм.