Монгол Улс, БНСУ-ын Хөдөө аж ахуйн яам хоорондын хамтарсан хорооны VI хуралдаан өнгөрсөн сарын 31-ээс энэ сарын 3-ны хооронд Бүгд найрамдах Солонгос улсын Сэжун хотод амжилттай боллоо. Энэ хуралд Монголын талаас  ХХААЯ, Мал эмнэлэг үржлийн газар болон Халх гол төслийн төлөөлөгчид оролцсон юм.

Хуралдаанаар Монгол болон Өмнөд солонгосын хүнс, хөдөө аж ахуйн салбарын бодлого, чиглэл, 2012-2014 онд хэрэгжүүлсэн болон дараагийн хоёр жилд хийх үйл ажиллагаа, төсөл хөтөлбөр, хамтын ажиллагааны чиглэл зэргийг хэлэлцсэн байна. Хурлын үр дүнд өмнөд солонгосын Мал аж ахуйн бүтээгдэхүүний чанарын үнэлгээний хүрээлэнгээс  олон улсын хамтын ажиллагааны хөтөлбөрийн хүрээнд Монголын талаас мал аж ахуй, хүнсний эрүүл ахуй, аюулгүй байдлыг хангах чиг үүрэг бүхий байгууллагын  мэргэжилтнүүдийг үе шаттайгаар сургахаар болжээ.  
Монголын талаас Халх голын бүс нутагт экспортын баримжаатай, хөдөө аж ахуйн чөлөөт бүс байгуулах, хүнсний ногооны үйлдвэрлэл, хангамжийг сайжруулах төсөл, мал эмнэлгийн салбар дахь хамтын ажиллагааны механизм бий болгох, шүлхий өвчинтэй тэмцэхэд хамтран ажиллах санал дэвшүүлсэн. БНСУ-ын талаас мал аж ахуйн гаралтай бүтээгдэхүүний үйлдвэрлэл болон түгээлтийн системт сургалт, “Төр, хувийн хэвшлийн хамтын ажиллагаагаар Монгол Улсын Хөдөө аж ахуйн салбарыг хөгжүүлэх” төслийн талаар танилцуулан, харилцан санал солилцжээ. Үүний зарим төсөл  хөтөлбөрийг  ирэх хоёр жилд хэрэгжүүлэхээр болсон байна.