Монгол Улсын Ерөнхийлөгчийн зарлигаар жил бүрийн тав, аравдугаар сарын хоёр дахь долоо хоногийн бямба гаригийг “Мод тарих үндэсний өдөр” гэж зарласан.

Байгаль дэлхийгээ хайрлах, дээдлэх үзлийг түгээн дэлгэрүүлж, мод тарих, ногоожуулах хөдөлгөөнийг олон нийтийн үйлс болгон өрнүүлж, иргэдийн оролцоог нэмэгдүүлэх ажлыг энэ өдрүүдэд зохион байгуулсаар ирсэн юм.

Аравдугаар сарын 10-ны энэ өдөр УИХ-ын дарга З.Энхболд, Ерөнхий сайд Ч.Сайханбилэг нар Үндэсний цэцэрлэгт хүрээлэнд жимсний мод тарилаа.

“Үндэсний цэцэрлэгт хүрээлэнд мод тарих дуртай. Хэдэн жилийн дараа өтгөн саглагар модны сүүдэрт улаанбаатарчууд амарч, тухалж суух сайхан газар болно гэж итгэдэг. Өнөөдөр өрөл жимсний таван мод тарилаа. Сая мод тарих хөдөлгөөнийг улс даяар өрнүүлж, амралтын энэ өдөр олон байгууллага, ялангуяа хүүхэд залуучууд ийм олноор ирж бүх нийтийн үйлсийг дэмжиж мод тарьж байгаад талархаж байна” гэж Ерөнхий сайд Ч.Сайханбилэг хэллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.