УИХ-ын дарга З.Энхболд өчигдөр АНУ-аас Монгол Улсад суугаа Онц бөгөөд Бүрэн эрхт Элчин сайд Женифэр З.Гаалтыг хүлээн авч уулзав.

Хоёр орны харилцаа, хамтын ажиллагааны хүрээнд 2015 онд Худалдаа, хөрөнгө оруулалтын ерөнхий хэлэлцээрийн ээлжит хуралдаан болон Монгол, Америкийн Эдийн засгийн бодлогын зөвлөлдөх уулзалтын анхны хурал болсон. Өнгөрсөн есдүгээр сард Монгол Улсын Гадаад хэргийн яам, Америкийн Нэгдсэн Улсын Төрийн департамент хоорондын ээлжит зөвлөлдөх уулзалт  зохиогдсон талаар УИХ-ын дарга онцлоод талуудын хамтын ажиллагаанд сэтгэл хангалуун буйгаа илэрхийлэв. Монгол, АНУ, Японы гурван талт уулзалтыг НҮБ-ын Ерөнхий ассамблейн чуулганы үеэр амжилттай зохион байгуулсныг дурдаад цаашид тогтмолжуулахыг тэмдэглэн хэлсэн юм.

Элчин сайд Женифэр З.Гаалт, УИХ-ын даргыг цаг гарган хүлээн авч уулзаж байгаад талархал илэрхийлсэн юм. Мөн тэрээр, АНУ, Монгол Улс хоорондын харилцаа, хамтын ажиллагаа олон салбарт амжилтай хөгжиж байгааг дурдаад, Элчин сайдаар ажиллах хугацаандаа хүчин чармайлт гарган ажиллах болно гэлээ.