АН-ын бүлэг хуваарь ёсоор хуралдаж, Сонгуулийн хуулийн төсөл, УИХ-ын сонгуулийн тухай хуульд нэмэлт, өөрчлөлт оруулах тухай хуулийн төслүүдийг хэлэлцүүлэгт бэлтгэх үүрэг бүхий УИХ-ын даргын захирамжаар байгуулагдсан ажлын хэсгийн мэдээллийг сонссон байна. Мөн Гааль, татварын ерөнхий газрын эрх зүйн байдлын тухай болон холбогдох бусад хуулийн төслүүдийн талаар хэлэлцэж, УИХ-аар хэлэлцэх нь зүйтэй гэдэг дээр бүлгийн гишүүд санал нэгджээ. Мөн өнгөрсөн долоо хоногт санал нэгдэж чадаагүй Ю.Цэдэнбалын мэндэлсний 100 жилийн ойг тэмдэглэн өнгөрүүлэх тухай УИХ-ын тогтоолын төслийг хэлэлцэж, ойг зохион байгуулах комиисын даргаар ЗГХЭГ-ын дарга С.Баярцогтыг томилсон байна.
Энэ талаарх мэдээллийг Бүлгийн дарга Б.Гарамгайбаатар өгсөн бөгөөд “Сонгуулийн хуулийг хэлэлцэхэд маш бага хугацаа үлдээд байгаа. 2015 оны арванхоёрдугаар сарын 5-ны өдрөөс өмнө амжуулж шийдвэрт хүрэх ёстой. Намуудын төлөөлөл оролцсон зөвшилцөх ажлын хэсэг байгуулагдан өнөөдрөөс уулзалт эхлэх төлөвтэй байна. Энэ асуудал хэдий хурдан хугацаанд зөвшилцөлд хүрч чадна, төдий чинээ хуулийн төсөл дээр сайн ажиллах бололцоо бүрдэнэ. Ардчилсан намын бүлэг Р.Бурмаа нарын гишүүдийн өргөн барьсан хуулийн төслийг дэмжиж байгаа” гэсэн юм. Мөн энэ долоо хоногоос эхлээд намуудын зөвшилцөх ажлын хэсгүүд Үндсэн хуулийн өөрчлөлт, Ард нийтийн санал асуугын тухай хуулийн төсөл болоод Сонгуулийн тухай хуулийн өөрчлөлтийн асуудлыг ярьж эхэлж байна гэсэн мэдээлэл өглөө.