Шүүх байгуулах тухай хуулийн зарим зүйл заалт Үндсэн хууль зөрчсөн гэх Цэцийн дүгнэлтийг УИХ хүлээж авсан билээ. Тодруулбал, Үндсэн хуульд “Шүүхийн үндсэн тогтолцоо ... аймаг, нийслэлийн шүүх, ... дүүргийн шүүхээс бүрдэх ...” гэснийг Шүүх байгуулах тухай хуулийн 1, 2 дугаар заалт зөрсөн гэж ҮХЦ үзсэн байдаг. Үүнийг УИХ хэлэлцэн хүлээн зөвшөөрсөн тул аймаг бүрт давж заалдах шатны шүүх, нийслэлийн дүүрэг бүрт анхан шатны шүүх байгуулах ёстой болсон. Энэ нь одоо ажиллаж байгаа тойргийн шүүхүүд дүүрэгт бүрт байрлаж ажиллана гэсэн үг юм.

Гэхдээ ҮХЦ-ийн дүгнэлтийг хүлээж авсан УИХ-ын тогтоолд Монгол Улсын Ерөнхийлөгч хориг тавьсан. Тэрээр “...Улс орны эдийн засаг, төсөв, санхүү хүндрэлтэй энэ үед шүүгч, түүний туслахын орон тоо, шүүхийн байр болон бусад зардлын асуудлыг шийдвэрлэхэд эдийн засгийн бололцоо муутай, Монгол Улсын 2016 оны Төсвийн тухай хуульд энэ зардлыг тусгаагүй зэрэг нь тогтоолыг хэрэгжүүлэхэд хүндрэлтэй, цаашлаад шүүн таслах үйл ажиллагаа тасралтгүй, хэвийн явагдахад сөргөөр нөлөөлөхөд хүргэж байна” гэж үзсэн юм.

Харин түүний хоригийг УИХ-ын чуулганы өчигдрийн үдээс өмнөх нэгдсэн хуралдааны эхэнд хэлэлцэн хүлээж авлаа. Ингэснээр тойргийн шүүхүүд хэвээр ажиллахаар болж байна.