МАН зохион байгуулж парламентад суудалгүй намуудыг хамруулан “Сонгуулийн хар машиныг эсэргүүцэх” жагсаал зохион байгуулж, санал тоолох хар машиныг шатаасан. Үүнээс үүдээд өнөөдөр Төрийн ордонд болсон УИХ дахь Ардчилсан намын бүлгийн хуралдаанд Сонгуулийн ерөнхий хорооныхон санал тоолох машин саналын хуудсыг үнэн зөв тоолж чадаж байгаа эсэх асуудлаар мэдээлэл өгчээ.  Мөн тус хорооныхон санал тоолох машинаар туршилтын тооллого хийж хуралдаанд оролцогсод, сэтгүүлчдийг оролцуулан “санал хураажээ”. Туршилтад УИХ-ын сонгуулийн 18 дугаар тойрог буюу Хэнтий аймгийг жишээ болгон 20 хүнээс санал хураахад  Б.Бат-Эрдэнэд 17, Н.Ганбямбад 15, Хүдэр-Ян, Алтаннавч, Жаргал нарт тус бүр 1 санал өгсөн байсан бол хүчингүй 7 хуудас гарч ирсэн байна.  Санал тоолох машинаар уншиж гаргасан дээрх дүн гар тооллогын дүнтэй мөн таарч, будилаангүй гэдгийг харууллаа.
Сонгуулийн ерөнхий хорооныхон санал тоолох машинаа бүх нам эвслийн бүлэгт, цаашдаа  парламентад суудалгүй намуудад ч танилцуулах юм байна.