Ерөнхий сайд Ч.Сайханбилэгийг огцруулах бичигт гарын үсэг зурсан гишүүд эхнээсээ байр сууриасаа ухарчээ. Гарын үсэг зурсан Р.Амаржаргал гишүүн Ерөнхий сайд Ч.Сайханбилэгийг огцруулах саналаасаа татгалзаж, Ардчилсан намын үйл ажиллагааг цаашид шинэ шатанд гаргаж, идэвхжүүлэх шаардлагатай гэж үзсэн байна. Энэ талаараа тэрээр сэтгүүлчдийн зарим асуултад хариулсан юм.

-АН-ын нөхөддөө хандан ил захидал бичиж, АН шинэчлэгдэх ёстой гэдгээ илэрхийлсэн байсан. Энэ захидлын талаар тодруулаач?
-Намын үйл ажиллагааг цаашид шинэ шатанд гаргаж, идэвхжүүлэх шаардлага байна. Энэ хүрээнд ямар ажил хийж болох талаар хэд хэдэн санаа хэлсэн юм. Нэгдүгээрт, биднийг нэгтгэж байгаа зүйл нь юу вэ гэдгээ цэгцлэх, хоёрдугаарт намынхаа үйл ажиллагаанд ардчиллын шинэ элементүүдийг оруулах ёстой. Тухайлбал, намын их хурлыг жил бүр хийдэг болоё. Ингэхдээ намын даргын асуудлыг заавал хэлэлцдэг байя гэсэн санаа дэвшүүлсэн. Гуравдугаарт, намынхаа нэр хүндийг унагаж, итгэлийг нь хөсөрдүүлж байгаа хүмүүс гишүүнчлэлээсээ түдгэлзээд холбогдох байгууллагаар шалгуулж, нэр төрөө сэргээлгэсний дараа буцаад ороод ирж болно. Дээрх зүйлүүдийн аль нь хэрэгжих эсэхийг хэлж мэдэхгүй байна. Ямартай ч намын ажлыг идэвхжүүлэх ёстой. Өөрөөр хэлбэл, Үндэсний зөвлөлдөх хорооны үйл ажиллагааг эрс шинэчилж, салхи оруулах хэрэгтэй. Ний нуугүй хэлэхэд, ҮЗХ-нд нутаг ус, хамаатан саднаараа орсон байх тохиолдол бий. Ядаж ҮЗХ-ны гишүүдийн гуравны нэгийг нэн яаралтай шинэчлэх шаардлага байна. Шинэчлэх, хэрэгжүүлэх эрхийг намын даргад олгох ёстой. Би хэтэрхий хатуурхаад байж магадгүй. Өгөгдсөн өгөгдлийн хүрээнд намын дарга чадлынхаа хэрээр зүтгэж байгаа. Ерөнхий сайд ч мөн адил. Би л хатуурхаад илүү зүйл шаардаад байгаа юм.

-Хэтэрхий хатуурхаад байж магадгүй гэлээ. Та Засгийн газрын үйл ажил­лагаанд сэтгэл дун­дуур байгаагаа байнга илэр­хийлдэг. Анх удаа л “Өгөгдсөн өгөгдлийн хү­рээнд намын дарга, Ерөнхий сайд нар чадлынхаа хэрээр зүтгэж байгаа” гэлээ?
-Ерөнхий сайд Ч.Сай­хан­билэг сая тайлангаа тавьсан. Энэ тайланг харж байхад хийсэн ажлууд байна. Гарц олох гэж бүхий л талаар хичээж, ажиллаж байгаа нь харагдсан. Ч.Сайханбилэг юм хийгээгүй биш хийсэн байна гэсэн ойлголт авсан. Нийгэм, эдийн засгийн хүндрэлээс гарах, бүтээн байгуулалтын том төслүүдийг хэрэгжүүлэх талаар анхаарч ажиллаж байгаа. Миний хувьд Засгийн газрын үйл ажиллагаатай холбоотой мэдээлэл дутуу байж гэсэн ойлголтод хүрсэн.

-Ерөнхий сайд Ч.Сайхан­билэгийг огцруулах бичигт АН-ынхнаасаа ганцаараа га­рын үсэг зурсан. Тэгэхээр та энэ саналаасаа татгалзах юм байна гэж ойлгож болох уу?
-Аливаа юмыг ялгаж салгаж ойлгох хэрэгтэй. Юм хийж байгаа, хийх гэж гарц хайж байгаа энэ үед заавал харлуулах, татаж унагах гэж зүтгэх шаардлагагүй. Өөрөөр хэлбэл огцруулах бус дэмжиж ажиллах цаг хугацаа бидэнд үлдээд байна.