Монгол Улсын Ерөнхийлөгчийн сонгуулийн санал хураалт өнөөдөр өглөө 07:00 цагт орон даяар эхэлсэн. Гэвч Сонгуулийн тухай хуулийн талаар мэдээлэл муутай байгаа иргэд саналаа баталгаажуулах гэж фэйсбүүк хуудсаараа дамжуулан хэнд саналаа өгсөн талаарх зургаа ихээр нийтлэх болов. Энэ нь Сонгуулийн тухай хуулийн Гуравдугаар дэд бүлэг буюу Сонгогч санал өгөх 92 дугаар зүйлийн 2.5-д заасан саналын хуудаст тэмдэглэсэн саналаа болон бусад сонгогчийн саналыг баримтжуулан зураг авах, дүрс бичлэг хийх зэрэг үйлдэл хийх, 2.6-д заасан саналын хуудаст хийсэн тэмдэглэгээг бусдад харуулах гэсэн заалтуудыг зөрчиж буй юм. Тус хуулиар бол дээрх зүйл, заалтуудыг зөрчсөн иргэн, холбогдох бусад этгээдэд эрүүгийн хариуцлага хүлээлгэхээргүй бол 14 хоногийн хугацаагаар баривчлах захиргааны шийтгэл ногдуулдаг.


Мөн энэхүү хуулиар аль нэг нэр дэвшигчийн төлөө санал өгөх, эсхүл өгөхгүй байхаар амлалт авах, мөнгө, эд зүйл шаардах, авахыг хориглодог байгаа. Тус хуулийн 71.2-т Сонгогчид хууль бусаар мөнгө, эд зүйл тараасан этгээд захиргааны болон эргүүгийн хариуцлага хүлээсэн бол тухайн зөрчлийг мэдээлсэн иргэнд сонгуулийн төв байгууллага тараасан бэлэн мөнгө болон эд барааны үнийн дүнг 20 дахин нэмэгдүүлсэнтэй тэнцэх хэмжээний мөнгөн урамшууллыг олгож, гэм буруутай этгээдээр нөхөн төлүүлнэ гэж заасан байдаг юм.