Уламжлалт анагаах ухааны салбарт дэлхийд нэр хүндтэйд тооцогддог Өвөрмонголын нарийн мэргэжлийн өндөр ур чадвартай эмч нар БНХАУ, Монгол Улс хооронд дипломат харилцаа тогтоосны 70 жилийн ойг тэмдэглэх “Хятад орныг танин мэдэх” цуврал арга хэмжээний хүрээнд манай улсад ирээд байгаа билээ. Тодруулбал, Өвөрмонголын олон улсын Монгол эмнэлгийн хорооны уламжлалтын тасгийн 9 эмч, мэргэжилтэн үнэ төлбөргүй үзлэг оношлогоо хийхээр ирсэн нь энэ. Тэд уржигдар Баянзүрх дүүрэг, өчигдөр Хан-Уул дүүргийн эмнэлэг дээр үнэ төлбөргүй үзлэг, оношлогоо хийж үзүүлэхээр ирсэн иргэдэд ходоод, зүрх судас, уламжлалт эмчилгээний арга болох таван засал, гэмтэл согог, яс бэртэл, мэдрэлийн цэгийн эмчилгээ хийсэн байна. Нярхай хүүхдээ тэвэрсэн эх, настан буурлууд ээлж дарааллаа хүлээн тэдэнд үзүүлж, эмчилгээ хийлгэж зөвлөгөө авсандаа туйлын баяртай байсан байна. Тэр бүү хэл Өвөрмонголын эмч нар ирж үнэгүй үзлэг оношилгоо хийнэ гэсэн сургаар холоос зорьж ирсэн хүн ч байсан ажээ.
Тэгвэл Өвөрмонголын эмч нар өнөөдөр Чингэлтэй дүүргийн эмнэлэг дээр мөн адил үнэ төлбөргүй үзлэг оношлогоо хийж байгаа юм байна. Энэ удаагийн үнэ төлбөргүй үзлэг, оношлогоог 700 хүнд хийнэ гэсэн төлөвлөгөөтэй ирсэн эмч нарын үзлэг хийх хугацаа өнөөдрөөр дуусч байгаа учир та амжиж Чингэлтэй дүүргийн эмнэлгийг зориорой.
А.АКЭРКЭ
