Улсын Их Хурлын 2016 оны сонгуульд нам эвслээс нэр дэвшигчдийг бүртгэх эсэх тухай асуудлаар Сонгуулийн ерөнхий хороо тогтоол гаргаж МАХН-аас нэр дэвшүүлсэн Д.Чинзориг, Ж.Энхбаатар, С.Саранхүү, Э.Эрдэнэжамъян, Н.Энхбаяр нарыг бүртгэхээс татгалзсан байна. 

Үүнтэй холбогдуулан  МАХН-ын дарга Н.Энхбаяр хэвлэлийн бага хурал зарлаж “СЕХ гэдэг байгууллага МАНАН-гийн гар хөл болсон байна” гэлээ. Мөн  ЦЕГ-ын Мэдээлэл лавлагааны төвөөс түүнд ял шийтгэлтэй эсэхийг тодорхойлсон албан бичиг гаргаж өгөөгүйг баталлаа.

Өнгөрсөн сарын 27-ны өдөр Мэдээлэл лавлагааны төвөөс Н.Энхбаярын төлөөлөгч Ц.Цэрэнжээд ирүүлсэн албан бичигтээ  “… танд ноогдуулсан … үндсэн нэмэгдэл ялыг өршөөн хэлтрүүлсэн байна. Иймд  Эрүүгийн хуулийн ерөнхий ангийн 78 дугаар зүйлийн 78.4 /энэ хуулиар тогтоосон журмын дагуу ялаас хугацааны өмнө суллагдсан этгээдийн ялгүй болох хугацааг үндсэн ба нэмэгдэл ял эдлэхээс  чөлөөлөгдсөн үеэс тоолно/ гэж зааснаар таны ялгүй болох хугацаа дуусаагүй байна” гэсан юм байна.

Цагдаагийн байгууллагаас өгсөн хариу тайлбарт  ч “78.2.3 дахь хэсэгт заасан, хүндэвтэр гэмт хэрэг үйлдсэн этгээд үндсэн ба нэмэгдэл ялаа эдэлж дууссанаас хойш таван жилийн дотор гэмт  хэрэг үйлдээгүй бол ялгүйд тооцно. Иймд таны ялгүй болох хугацаа дуусаагүй байна” гэж заажээ.

Ингэснээр ялаа эдэлж дуусах, ял эдлэхээс чөлөөлөгдөх гэсэн хоёр өөр ойлголтыг хольж хутгажээ гэсэн юм. 2009 оны Өршөөлийн хуульд зааснаар би ялаас чөлөөлөгдсөн учир ял тоологдохгүй. Эрүүгийн хуулийн тайлбарт “… Өршөөл үзүүлж, ялаас чөлөөлөгдөж байгаа бол чөлөөлөгдөхийн хамт ялгүй болно” гэж тайлбарласан байдаг хэмээн  МАХН-ын дарга Н.Энхбаяр сэтгүүлчдэд дэлгэн тайлбарлалаа.  

Иймд Н.Энхбаяр хуулийн дагуу маргаашийн дотор дахин лавлагаа гарган өгнө үү хэмээн  ЦЕГ- т хүсэлт таваьсан гэдгээ энд хэллээ.