Сэтгүүлч Т.Алтаншагай, хуульч Х.Бат-Ялалт нар УИХ-ын гишүүн Л.Эрдэнэчимэгийн Төрийн ордонд ажлын өрөөндөө согтуу тамхи татан, ёс бус үг хэлж буй бичлэгийг олон нийтэд дэлгэсэн.  Тэдний хэлж буйгаар Т.Алтаншагайд зургадугаар сарын 5-нд үл мэдэгдэх хаягаас "Үнэнээ хэлэх мөч" нэвтрүүлэгтээ оруулаарай хэмээх захидал, флашийн хамт дугтуйд хийж илгээсэн хэмээсэн. Флашийг нээж үзэхэддээрх бичлэг байсан гэнэ. Тэд Л.Эрдэнэчимэгт бичлэгийг үзүүлж учрыг асуухад "Хэдэн төгрөг авах гэсэн юм, дансаа өгчих" гээд данс руу нь 50 сая төгрөг шилжүүлсэн гэх. Харин тэдний энэ мэдээллийг Л.Эрдэнэчимэг гишүүнээс тодруулахад "Надаас Х.Бат-Ялалт найз нөхдийн журмаар 50 сая төгрөг зээлсэн. Болсон явдлын талаар хэвлэлийн хурал зарлаж тайлбар хийнэ" хэмээн мэдэгдсэн билээ. Тус бичлэг нь УИХ-ын гишүүн Г.Уянгын хийсэн бичлэг байсан бөгөөд Г.Уянга гишүүн утсаа хулгайд алдсан хэмээн цагдаад мэдүүлжээ.
Ингээд өчигдөр Л.Эрдэнэчимэг гишүүн дээрх үйл явдалд тайлбар хийв. Тэрээр  “Болж өнгөрсөн явдлыг эхнээс нь ярья. 2016 оны зургадугаар сарын 6-нд Бат-Ялалт надтай ирж уулзсан. Бичлэг үзүүлээд 200 сая төгрөгөөр зарна гэсэн. Бичлэгийг үзэхэд миний төрсөн өдрөөр Уянга гишүүн гар утсаараа тоглоод бичиж байсан бичлэг болохыг таньсан. Тэгээд Г.Уянга гишүүний гар утсан дээрх бичлэг яагаад өөрт чинь очсон юм бэ гэж лавлахад хуулийн байгууллагад хандаж, асуудлыг шалгуулна гэж хэлсэн.

Бат-Ялалтаас салаад Уянга гишүүнтэй уулзтал “Би утсаа хулгайд алдсан. Гар утасныхаа асуудлаар Чингэлтэй дүүргийн цагдаад хандсан. Та бас ханд” гэж хэлсэн.  Энэ сарын 7-нд Чингэлтэй дүүргийн Цагдаагийн газар очиж Х.Бат-Ялалт гэдэг хүн бичлэг үзүүлж 200 сая төгрөг нэхсэн талаар гомдол гаргасан. Одоо энэ хэрэг дээр цагдаа нар ажиллаж байгаа. Миний өгсөн гомдлын дагуу Бат-Ялалт очиж мэдүүлэг өгсөн байх ёстой. Уянга гишүүний утсыг яаж хулгайлж авсан талаараа мэдүүлсэн болов уу гэж бодож байна. Х.Бат-Ялалт надаас долоо хоногийн турш мөнгө нэхсэн. Намайг мөнгө өгөхгүй энэ асуудлыг шүүхээр шийдүүлнэ гэхэд сонгуулийн дараа өгье мөнгө зээлчих гэсэн. Тиймээс түүний данс руу 50 сая төгрөгийг өөрийн нэр дээрээс зээл гээд шилжүүлсэн. Зээлээ төлөхгүй бол насан туршдаа нэхнэ шүү гэж хэлсэн. Үүнийг Бат-Ялалт насан туршийн зээл гэсэн гээд яриад байх шиг байна билээ.

Ажлын байрандаа вино ууж, тамхи татаж би ёс зүйн алдаа гаргасандаа ард түмнээсээ уучлалт гуйж байна. Хэлсэн үг нь бол хүний эрхий асуудал гэж бодож байна. Хууль зөрчсөн үйлдэлдээ зохих торгуулиа төлсөн. Хуулийн дагуу 50 мянган төгрөгөө төлчихөөд ирлээ. Цаашид өөр хариуцлага хүлээх ёстой бол хүлээнэ. Би 1984-1990 онд Болгарт сурч байхдаа тамхи татаж сурсан. 20 жил тамхи татсан. Өөрөө тамхи татдаг учраас Тамхины хяналтын тухай хууль гаргах хэрэгтэй гэж үзсэн учраас санаачилсан. Мэдээж өөрийн санаачилсан хуулиа зөрчсөн нь ёс зүйн том алдаа гэж үзэж байна.

Сүүлийн нэг жилийн хугацаанд Тавантолгойн ажлын хэсгийг ахлаж эхэлсэн үеэс намайг байнга дарамталж, заналхийлж байгаа. "Аятайхан байхгүй бол ална шүү" гэж утсаар байнга ярьдаг. “Тост тосон бумбын нурууг хамгаалалтад авах юм бол 50 тэрбум төгрөг Оюунгэрэл та хоёр төлөөрэй. Хараарай” гэж байнга заналхийлдэг. Энэ хэргээс болж биологич залуу амь насаа алдсан гэдгийг та бүхэн мэдэж байгаа. Бат-Ялалт, Алтаншагай хоёр биднийг байнга заналхийлж байгаа мөнгөтэй бүлэглэлийн гар хөл юмаа гэж харж байна. Тэр хоёр нэр дэвшигч. Энэ цаг үед иргэдтэйгээ уулзаад мөрийн хөтөлбөрөө танилцуулаад маш завгүй явж байх ёстой баймаар.

Энэ хэрэг олон өдрийн өмнөөс нарийн төлөвлөгдсөн. Алтаншагай 72 дугаар тойрог дээр яагаад надтай өрсөлдөхөөр болов. Бат-Ялалт 71 дүгээр тойрог дээр намайг өрсөлдөнө гэж андуураад тойргоо сольж чадаагүй тэндээ нэрээ дэвшүүлсэн гэж бодож байна. Эрчүүд яагаад нийлээд эмэгтэйчүүд рүү ингэж дайрч байгаа юм бэ. Өнөөдөр 475 хүн УИХ-д нэрээ дэвшүүлээд явж байхад зөвхөн эмэгтэйчүүдрүү дайрсан, ийм хэргүүд удаа дараа гарч байна. Нараг ямар үгээр доромжилж, яаж доошоо хийсэн билээ. Анужингийн бичлэгийг хэдэн удаа гаргаж тавилаа. Одоо дараагийн хүнээр хэнийг онилж байгаа юм бол.

Би “1072 ширхэг хувьцааг эдийн засгийн эргэлтэд оруулна” гэсэн уриатай сонгуульд нэр дэвшиж байна. Иргэд хувьцааныхаа мөнгийг авах гээд банкинд дугаарланзогсч байгаа. Би энэ ажлын эхлэлийг тавьсан. Өнгөрсөн жил Тавантолгойн хөрөнгө оруулалтын гэрээ батлагдсан бол 1072 ширхэг хувьцааг мөнгөжүүлэх үйл явц хийгдэхгүй байсан. Тиймээс үүний хариуг шат дараатайгаар надаас авч байна гэж үзэж байна. Бат-Ялалт, Алтаншагай нар хэний гар хөл болж ийм хэрэг хийж байгааг хуулийн байгууллага шалгаж үнэн мөнийг нь тогтоож өгнө гэдэгт итгэж байна. Бат-Ялалт, Алтаншагай мэтийн шантаажлагчдыг битгий сонгоорой. Нам харгалзахгүй эмэгтэйчүүдээ дэмжээрэй гэж уриалмаар байна. Цаашид 1072 хувьцааг амьд байж, жил бүр ногдол ашиг өгдөг болгохын төлөө би ажиллана. Монголын баялагийг монголчуудын гарт үлдээхийн төлөө тэмцлээ явуулна гэдгээ хэлье” хэмээн тэрээр тайлбар хэлсэн ч сэтгүүлчдийн асуултад хариулаагүй юм.