Сонгуулийн насны иргэд burtgel.mn  сайт руу орж регистрийн дугаараараа өөрийн бүртгэлээ баталгаажуулж, сонгуулийн хэддүгээр хэсэгт сонгууль өгөхөө мэдэж буй. Тус бүртгэлд зарим иргэдийн бүртгэл “Түр хасав” гэсэн тэмдэглэгээтэй байгаа. Тэгвэл энэ талаар Улсын бүртгэл, статистикийн ерөнхий газрын иргэний бүртгэлийн газраас тайлбар хийлээ. Сонгуулийн санал хураалт эхлэхээс 55-аас доошгүй хоногийн өмнө Иргэний харьяалал шилжилт хөдөлгөөний газраас гадаадад 60 ба түүнээс дээш хоногоор гарсан иргэдийн мэдээллийг Улсын бүртгэл, статистикийн газраас ирүүлдэг байна. Тэдгээр иргэдийн нэрийг сонгууль өгөх иргэдийн нэртэй тулгаад эх орондоо буцаж ирээгүйг нь “Түр хасав” хэмээн бүртгэдэг аж. Хамгийн сүүлд энэ сарын 2-нд иргэдийн бүртгэлийг хийжээ. Өөрөөр хэлбэл, энэ сарын 2-ноос хойш эх орондоо буцаж ирсэн иргэд “Түр хасав” гэсэн төлөвт бүртгэгдсэн гэсэн үг болж байна. Мөн үүн дээр шүүхээр эрх зүйн чадамжгүй хэмээн тогтоогдсон болон хорих ангид ял эдэлж буй иргэд нэмэгдэж байгаа аж.
Өнөөдрийн байдлаар 85 мянган хүн “Түр хасав” төлөвт бүртгэгдсэн байгаа ч зургадугаар сарын 2-ноос хойш эх орондоо ирсэн зэрэг 1685 иргэний сонгуулийн эрхийг сэргээсэн байна. “Түр хасав” төлөвт бүртгэгдсэн иргэд ийм тэмдэглэгээ хийлгэсэн шалтгаан нь арилсан тохиолдолд санал авах өдрөөс өмнө болон санал авах өдөр хүсэлтээ гарган, нотлох баримтаа үзүүлэн  тэмдэглэгээг хүчингүй болгуулж саналаа өгөх боломжтой юм байна.