Хүн амын хөгжил, нийгмийн хамгааллын сайд С.Эрдэнэ Засгийн газрын 113 дугаар тогтоолд өөрчлөлт оруулах төслийг УИХ-ын даргад өргөн барилаа.
Хүүхдийн мөнгийг анх 2012 оноос олгож эхэлснээр  орлого багатай айлын нэг сарын хэрэглээг залгуулж байсан бол  дундаж орлоготой айл хүүхдийн мөнгөө хадгалуулж хуримтлал үүсгэдэг байсан юм.

Гэтэл оны өмнөхөн хүүхдийн мөнгийг ялгавартай буюу өрхийн амьжиргааны түвшний зөвхөн 1-17 дугаар бүлгийн өрхийн 0-18 хүртэлх насны хүүхдэд олгохоор шийдвэрлэснээр  601.1 мянган хүүхэд буюу одоо хүүхдийн мөнгө авч байгаа хүүхдийн 58.2 хувь нь авч, өрхийн амьжиргааны түвшингийн 18-20 дугаар бүлэгт багтдаг  өрхийн 128,795 хүүхэд болон амьжиргааны түвшинг тодорхойлох судалгаанд хамрагдаагүй өрхийн 297,475 хүүхэд буюу нийт 426.3 мянган хүүхэд 2016 оны 01 дүгээр сарын 01-нээс эхлэн хүүхдийн мөнгө авахааргүй болоод байсан юм.

Иймд Монгол Улсын Их хурлын 2015 оны 11 дүгээр сарын 13-ны өдрийн 103 дугаар тогтоолын 2 дахь заалтын “1-17 дугаар бүлгийн” гэснийг хасч, 2 дахь заалтад уг тогтоолыг 2016 оны 01 дүгээр сарын 01-ний өдрөөс эхлэн дагаж мөрдөхөөр өөрчилсөн тогтоолын төслийг өргөн барьж байгаа юм.

Энэ тогтоолын төслийг УИХ баталбал Монгол Улсын  0-18 насны нэг  сая 30 мянган хүүхэд хүүхдийн мөнгө авах эрхтэй болох юм.


2016 оны улсын төсөвт хүүхдийн мөнгө олгоход зориулан  147 тэрбум төгрөг тусгасан  нь энэ бүх хүүхдэд ирэх наймдугаар сар хүртэл  20 мянган төгрөг хэвийн олгоход хүрэлцэх аж. Харин наймдугаар сараас төсвийн тодотгол хийж үргэлжлүүлэн олгох боломжтой юм байна.