Дэлхий нийтээр жил бүрийн гуравдугаар сарын 1-нд “Дэлхийн иргэний хамгаалалтын өдөр”-ийг тэмдэглэдэг уламжлалтай. Энэ жилийн хувьд Олон улсын иргэний хамгаалалтын байгууллагаас дэлхийн иргэний хамгаалалтын өдрийг “Иргэний хамгаалалт ба мэдээллийн технологи” гэсэн уриа, сэдэв дор тэмдэглэн өнгөрүүлэхээр төлөвлөсөн байна. Манай улсын хувьд тус уриалгын хүрээнд Дэлхийн иргэний хамгаалалтын өдрийг улсын хэмжээнд тэмдэглэн өнгөрүүлэх бөгөөд Онцгой байдлын ерөнхий газрын хувьд энэ өдрийг байгууллагаа олон нийтэд сурталчилан таниулах, албан хаагчдын чөлөөт цагийг зөв боловсон өнгөрүүлэх, мэдлэг боловсролыг дээшлүүлэх зорилтын хүрээнд спортын уралдаан тэмцээн, мэдээллийн цагийг зохион байгуулан тэмдэглэхээр болсон байна.

Улмаар өнөөдөр Нийслэлийн хүрээний Онцгой байдлын байгууллагын офицер бүрэлдэхүүний дунд зохион байгуулагдаж буй “Гар бөмбөг”-ийн тэмцээн эхлээд байна. Харин ирэх ням гараг буюу энэ сарын 28-ны өдөр ОБЕГ, НОБГ, ГСХ, АТА, УУАА, ХҮА-ийн албан хаагчдын дунд  Цэцээ гүний ноён оргилд спорт явган аялал зохион байгуулах бол гуравдугаар сарын 2-ны өдөр Нийслэлийн Онцгой байдлын газрын анги байгууллагуудын дунд “Марш тактик” тусгай бэлтгэлийн тэмцээнийг  Хүй долоон худагт зохион байгуулах юм.