МЗХ-ноос хэрэгжүүлж буй "Хулгайчгүй Монгол" үндэсний хөдөлгөөнөөс энэ сарын 7-нд 1992 оноос хойш өнөөг хүртэл улс орны нийгэм, эдийн засаг болоод ард иргэдийн амьдралд хамгийн их уршиг дагуулсан 100 хар үйл явдлыг албан ёсоор зарлахын зэрэгцээ хөгжлийн гарц хайсан гутлын жагсаал зохион байгуулахаар болжээ.

Жагсаалд “нэгдсэн” гутал бүрийн цаана хэлэх санаа, тулгарсан асуудал байгаа бөгөөд уг жагсаалаас хүний эрх, өнөөгийн нийгмийн өнгө төрх гээд олон зүйлийг харж болно. Жагсаал хүн бүрт нээлттэй, харин жагсаалд очихдоо нэг илүү гутлаа сугавчлаад очих хэрэгтэй. Хэрэв та завгүй бол гутлаа илгээгээд үзэл бодлоо илэрхийлэх боломжтой гэж “Хулгайчгүй Монгол” хөдөлгөөнийнхөн дуулгалаа. Өөрөөр хэлбэл гутал тань таныг төлөөлж талбай дээр “үгээ хэлэх нь”.

Тус хөдөлгөөнийхөн өнгөрсөн оны 3 дугаар сараас “Хулгайчгүй Монгол” үндэсний хөдөлгөөнийг орон даяар өрнүүлж эхэлсэн. Уг хөдөлгөөн нь Монгол төрийн босгыг өндөрсгөх зорилгоор 100 хар үйл явдал, Хар Цагаан жагсаалт гаргахаа мэдэгдэж байсан юм.