Засгийн газраас хэрэгжүүлж буй “Төрийн түрээсийн орон сууц” хөтөлбөрийн бүртгэл өнгөрсөн сарын 21-30-нд үргэлжилж, нийт 4000 орчим иргэн хүсэлт ирүүлснээс 2262 иргэний материал журмын шаардлага хангаж улмаар бүртгэлд хамрагдсан. Түүнчлэн, бүртгэл дууссанаас хойш хамрагдаж чадаагүй иргэдийг бүлэг үл харгалзан нэмэлтээр бүртгэсэн бөгөөд материал ирүүлсэн иргэдийн тоо түрээсийн орон сууцны квотоос давсан тул иргэдийг сугалаагаар сонгохоор болсон.

Шаардлага хангаж, бүртгэлд хамрагдсан иргэдийн материалыг хянах ажил маргааш дуусах бөгөөд үүний дараа сугалаа явуулах тов зарлагдах юм байна. Зорилтот долоон бүлэгт ангилсан бүртгэлийн сугалааг ил тод, шударга байлгах үүднээс цахимаар явуулж, Шударга өрсөлдөөн хэрэглэгчийн төлөө газар (ШӨХТГ), Барилга хот байгуулалтын яам болон бүртгэлд хамрагдсан иргэдийн төлөөллийг байлцуулж, хэвлэл мэдээллийн хэрэгслээр шууд дамжуулах ажээ.