1925 оны энэ өдөр анхны Ю-13 онгоцыг хүлээн авсан онцгой үйл явдлаар Монгол Улсын нисэх хүчний түүхэн хөгжил эхэлжээ. Энэ өдөр бэлгийн онгоцны анхны цувааг ЗХУ-ын нисгэгч А.И.Лапин тэргүүлж Улаанбаатар хотын консулын дэнжид газардсанаар агаараар нисдэг аэроплан хөлөглөх хувь заяа Монголын ард түмэнд тохиосон байна. Энэ чухал үйл явдлын талаар их зохиолч Д.Нацагдорж  “Соёлыг гайхав” өгүүллэгээ бичиж тэр нь ихэд алдаршсан билээ. Үүнээс хойш удалгүй гурван ширхэг дайрагч “Р-1” онгоц ирснээр Сүхбаатарын нэрэмжит анхны цэргийн нисэх отряд байгуулагдсан түүхтэй аж.

Анхны монгол сонсогч нар Оренбург хотын Уршиловын нэрэмжит дээд сургуульд сурахаар явсан 1930-аад оны эхээр улс төрийн нөхцөл байдал ширүүсэн үймээн самуун, зэвсэгт бослого гарч, байлдааны үүрэг гүйцэтгэх зайлшгүй шаардлага тулгарснаар  Р-1 онгоцоор агаарын буудлага, бөмбөгдөлт хийж байжээ. ЗХУ-д төгссөн анхны нисгэгчид У-2 онгоцоор Монголд ирж, лам нарын эсрэг ахин байлдаж, 1932 оны аравдугаар сар гэхэд бослогыг үндсэнд нь дарж, толгойлогч нарыг баривчилсан байдаг. Энэ үед манай нисэх отряд гурван ширхэг Р-1, гурван ширхэг PS, Юникерс 13-1, Юникерс 33-1 онгоц, 1933 онд 2 нисэх отряд, 1935 онд 15 ширхэг PS, 13 ширхэг У-2, 2 ширхэг КS, 1 ширхэг Юникерс, 3 ширхэг Р-1 нийт 34 онгоц, гадаад, дотоодод төгссөн 23 боловсон хүчинтэй болж байжээ.