Төрийн албыг худалдаж, мөнгө босгох тухай МАН-ын удирдлагуудын ярьсан аудио бичлэг сүүлийн өдрүүдэд олон нийтийн сүлжээ болон хэвлэл мэдээллийн хэрэгслээр цацагдлаа. Энэ мэдээллийг эмзэглэн хүлээн авч, санаа зовж, айдас түгшүүрт автаж байгаагаа төрийн олон албан хаагч бидэнд илэрхийллээ.

Төрийн албыг дэлгүүрийн бараа мэт харж, мөнгөөр үнэлэн, албан үүргээ гүйцэтгэж байгаа албан хаагчдыг хомроглон халах тухай энэ бичлэг нь ажлаа шударгаар хийж байгаа төрийн жинхэнэ албан хаагчдыг айдаст автуулжээ.  Төрийн албыг улс төрийн арилжаа наймааны хар зах болгохыг санаархсан энэхүү үйлдэл нь олон мянган эгэл жирийн, шударга албан хаагчийн нэр төрийг сэвтүүлсэн, Монгол Улсын Үндсэн хууль, бусад холбогдох хуулиудыг зөрчсөн төдийгүй төрийн албыг тасралтгүй үргэлжлүүлэх, залгамж чанарыг алдагдуулж,  уландаа гишгэсэн маш ноцтой үйлдэл боллоо.

Нийслэлийн нутгийн захиргааны байгууллагуудын ямар ч шатанд ажиллаж байгаа албан хаагчдыг бид улс төрийн  үзэл бодлоор ялгаварлалгүйгээр ажлын  дадлага туршлага,  мэргэжил ур чадварыг харгалзан, тогтвортой ажиллуулж ирсэн.   Нийслэлийн  нутгийн  захиргааны албан  тушаалтныг томилохдоо сонгон шалгаруулах, дэвшүүлэн  ажиллуулах гэсэн  зарчмыг хатуу  баримтлан ажиллаж, нийслэлийн  нутгийн  захиргааны байгууллагуудын  төрийн  албан хаагчдын  нийгмийн  асуудлыг   үе шаттайгаар шийдвэрлэсээр ирсэн, цаашид ч энэ зарчмын дагуу ажиллах болно.