Хүний эрхийн төлөөх иргэний байгууллагууд нэгдэн УИХ-ын гишүүдэд шаардлага хүргүүлж байна. УИХ-аар баталсан Гэр бүлийн хүчирхийлэлтэй тэмцэх тухай хууль болон холбогдох хуулиудыг буцаасныг эсэргүүцэж байгаагаа тэд мэдэгдэж, анхны батлагдсан хэвээр нь хэрэгжүүлэхийг шаардсан юм. Хүний эрхийн тухай чухал заалт бүхий олон талын оролцоотой боловсруулж, батлуулсан хуулийг УИХ-ын тогтоолоор буцаасан нь буруу жишиг. Түгээр ч зогсохгүй олон нийтийн эсэргүүцэлтэй тулгараад Засгийн газар дахин өргөн барих гэж байгаа нь хуулийг дордуулна гэж үзэж байгаа аж. Тэд УИХ-ын гишүүдэд хандсан шаардлагадаа “УИХ-ын 2016 оны наймдугаар сарын 30-ны өдрийн 26 дугаар тогтоолд Монгол Улсын Ерөнхийлөгчийн тавьсан хоригийг хүлээж авах. Батлагдсан хуулиудын эцсийн найруулгыг сонсч, ёсчлон хүчин төгөлдөр болгохыг шаардаж буй хариуг холбогдох хуульд заасныг дагуу хугацаанд нь олон нийтэд нээлттэйгээр албан ёсоор мэдэгдэх” хэмээн дурдсан байлаа.

УИХ аль ч намын төлөөллөөс бүрдсэн байсан хууль дээдлэх зарчмын дагуу хуулийг ёсчлон хүчин төгөлдөр болгох үүргээ биелүүлэх учиртай. Батлагдсан хуулиудыг УИХ-ын тогтоолоор буцаах буруу жишиг тогтоож байгааг эсэргүүцэж, энэ нь Үндсэн хууль зөрчсөн үйлдэл гэж мэдэгдэв. Эрүүгийн хуулийн багц шинэчлэлд багтсан дангаараа хэрэгжих боломжгүй Гэр бүлийн хүчирхийлэлтэй тэмцэх тухай хуулийг нэн яаралтай батлагдсан чигээр нь хэрэгжүүлэх ёстой гэлээ. Ганц сард л хоёр хүн гэр бүлийн хүчирхийлэлд өртөн амиа алдаж байгаа энэ цаг үед хуулийг баталгаажуулахгүй байхын хор уршиг их гэдгийг тайлбарласан юм. Гэрч, хохирогчийг хамгаалах асуудал энэ хуулийг буцааснаас болж хэрхэн алдагдаж, хохирч байгаа тухай мэдээлэл хүргэхээр хэвлэлийнхэнд ханджээ. Хэдийгээр Засгийн газар хуулийг дахин өргөн барина гэсэн ч энэ нь нэг ёсондоо ухралт хэмээн Хүний эрхийн төлөөх иргэний нийгмийн байгууллагууд үзэж байна.
Тэдний бүрэлдэхүүнд хүний эрхийн төлөө ажилладаг Монфемнер үндэсний сүлжээний 27, иргэний нийгмийн сүлжээний 23, Монголын хүний эрхийн ТББ-уудын форумын 62, Эвт сайн хөрш ТББ, Хөгжлийн бэрхшээлтэй иргэдийн ТББ-уудын сүлжээний 25, хүүхэд хамгааллын сүлжээний 26 гишүүн байгууллага, эвсэл багтжээ.