Б.БАДРАЛ

Энэтхэгийн батлан хамгаалах яам Оросоос хамгийн сүүлийн үеийн “Т-90МС” танк 464 ширхэгийг худалдан авах гэрээг зөвшөөрсөн тухай тус улсын мэдээллийн хэрэгслүүд шуугиж байна. Шинэ танкийг Энэтхэг дэх үйлдвэр дээр оросуудын лицензийн дагуу, орос эд ангиар угсрах бөгөөд үүнд хоёр тэрбум орчим ам.доллар Орост төлнө.

Энэтхэг урьд нь ч Т-90 танкийг Оросоос худалдан авсан юм. 2001 онд “Т-90С”  танк худалдан авах, Энэтхэгт үйлдвэр барих талаар Оростой тохиролцсон байдаг. Гэрээ ёсоор эхний цувралуудыг л Орост үйлдвэрлэх бөгөөд үлдсэн дийлэнх танкийг Энэтхэгийн үйлдвэрт угсрах юм. Энэ гэрээ ёсоор 2020 он гэхэд Энэтхэгийн арми нь зэвсэглэлдээ 1657 ширхэг “Т-90С” авах юм. “Т-90МС” нь өмнөх “Т-90С” загвараас олон талаар давуу. Энэ хоёр гэрээг хэрэгжиж дуусахад Энэтхэг нь зэвсэглэлдээ хамгийн олон Т-90 танктай улс болж хувирна. Оросууд өөрсдөө зэвсэглэлдээ 500 орчим Т-90 танктайгаас тэн хагас нь тусгай хадгалалтад байдаг.

Энэтхэгийн Батлан хамгаалах яам өөрийн зохион бүтээгчдийн боловсруулсан “Аржуна” танкийг ихээр худалдан авна гэж яригдаж байсан ч эцсийн дүнд Оросын танк нь илүү найдвартай, арай хөнгөн, хоёр дахин хямд байсан тул ийнхүү сонгон авсан бололтой.