Монгол Улсын Шинжлэх ухаан, технологийн хуулийн 21.1.3-т: “энэ хуулийн 11.2-т заасан байгууллагад тасралтгүй 25 ба түүнээс дээш жил эрдэм шинжилгээ, туршилт, зохион бүтээх ажил эрхэлсэн эрдэм шинжилгээний болон инженер-техникийн ажилтан, лаборант өндөр насны тэтгэвэр тогтоолгох бол ажиллаж байгаа байгууллагаас нь 12 сарын үндсэн цалинтай тэнцэх хэмжээний нэг удаагийн мөнгөн тэтгэмж олгох” гэж заасан байдаг. Гэвч тухайн байгууллагуудад ажилладаг нягтлан бодогч, нярав, номын санч, жижүүр, сантехникч, үйлчлэгч зэрэг олон хүнийг эрх ашгийг хохироож, дээрх тэтгэмжийг авч чадахгүй тэтгэвэрт гарахад хүргэдэг аж. Энэ нь Монгол Улсын Үндсэн хуулийн 14.2-т “хүнийг... эрхэлсэн ажил, албан тушаал... боловсролоор ялгаварлан гадуурхаж үл болно” гэсэн заалтыг зөрчиж буй юм. Тиймээс  Шинжлэх ухаан технологийн тухай хууль батлагдсан цагаас хойш 10 гаруй жил энэ заалтаар тэтгэмж авч чадаагүй ажилтнуудын хохирлыг нэхэмжилж Шинжлэх ухааны байгууллагуудын үйлдвэрчний эвлэлийн нэгдсэн хорооноос Үндсэн хуулийн цэц ба холбогдох шүүхийн байгууллагад хандахаар шийдвэрлэсэн байна.